匯豐「黑池」勢在必行

匯豐將於第三季推出StockMax，形式與外國流行多年既「黑池」相似。匯豐表示客戶透過StockMax對盤，或可以獲得比市價更佳的價格交易。現時仲係測試階段，首先比內部員工試用，之後會擴展至機構投資者，最後就係散戶。如果匯豐客戶無提出反對，便會自動使用StockMax內部對盤。

會唔會變成大鱷既午餐仲係言之尚早，肯定既係匯豐客戶於交易市場佔有率都較高，如果匯豐客戶係StockMax「自己搞掂」，之後先向港交所提交資料，始終時間上一定會延遲，而非匯豐客戶係不能參與既情況下，亦只能夠眼白白比個市牽住鼻子走。雖然其他銀行並未表示會跟隨，但係長遠黎講「黑池」應該都係勢在必行，相信一定對客源唔夠銀行大既證券行有深遠影響。

九巴 第二個領匯?

九巴母公司載通國際早前發出盈利警告，表示油價不斷上升就算加價都抵消唔到成本，促請政府成立票價穩定基金。講左咁耐，重點都係想政府出錢，幫下佢地度過難關。佢地既所謂難關，似乎係因為「賺得唔夠多」。

仲表示如果成本上升而加價都未能彌補，結果就係倒閉。堂堂一間大公司，唔通因為「賺得唔夠多」而威脅政府威脅市民要倒閉。另外一個公共交通工具加價既有力理由就係 – 票價可加可減機制，可惜一直以黎呢個似乎只係一個「有加無減」機制。呢個機制本身就一個加價既黃牌，市民只有無奈地屈服於黃牌之下。

早前有節目提出，九巴巴士車箱的空氣中含有一些有害人體既化學物，其含量比正常超標，係型號較舊既巴士出現呢種情況既機會較大。其實市民每日乘搭巴士時都吸住不同的廢氣，九巴又有無決心去改善呢個情況，轉換車款呢？而唔係好似領匯咁，以股東利益為大前提，不斷提出「賺得唔夠多」。

QE3 得個UP?

美國聯儲局主席伯南克提到美國經濟仍然疲弱，如果有必要的話，QE3有可能出台。究竟是否只是出口術？但係黃金都出現反應。QE1同QE2 的作用相信大家都心中有數，美國呢幾年不斷印銀紙，印到美元持續走弱，貨幣走弱有利出口。另一方面美國不時都「要求」中國人民幣升值，雖然貨幣的升值會較「值錢」，但出口方面的成本就會增加。如果QE3出，可能美元的弱勢仲會持續。

銀行的承諾

近日，看見旺角Citibank外牆的一幅大型營光幕，展示…理財服務於20秒內會有專人接聽電話。今日於報紙中，亦看到銀行的獨家承諾。看完後都不以為然，只是覺得這是基本的銀行服務。而今日就正正感受到這些承諾的威力！

因想詢問關於信用卡的一些問題，於是致電大新銀行查詢。第一次致電是在中午時候，等候了10分鐘，還未有客戶主任接聽。心想午飯時間應該致電的人比較多，所以決定午飯後再次致電。第二次是在下午四時左右，等到14分鐘的時間，真是很想放棄(因為我使用手提，確實浪費了很多分鐘…建議使用固網)，等到15分鐘多，終於有人接聽。等待了15分鐘，而我的詢問在4分鐘內完成。

這4分鐘是以15分鐘換取得來，相信客戶主任都很辛苦地應對客人，客人要等待亦在所難免。不過管理層方面應該想想，維持客戶關係長遠是對公司發展是有好處的。盡快接觸客戶可提升公司形象，這一方面的確要花些時間去改善。

復建居屋 希望未到

住屋問題一直都係香港既深層次矛盾，政府早前推出置安心計劃，仲未能夠令香港人「安心」。王光亞黎完香港去澳門，有比較之下王生表示澳門住屋比香港好，上面都出到聲，香港政府仲唔拿拿林將02年停建居屋決定改變。其實香港地產業李生主宰香港經濟命脈，基於「自由經濟」下政府又點敢干預商業活動。呢頭推出置安心、復建居屋，個頭賣地又創新高。政府表示會提供限呎單位，大家記住係限呎，唔係限價。

而置安心復建居屋又要等七年，到時一定更渴市，除左買六合彩碰碰運氣，仲可以試下抽居屋。唔好話後生仔要置業難，好多係社會工作10年既經驗人士都一樣咁難。連申請公屋都成為大學生未踏足社會就要計劃的一部分。民生問題日漸嚴重，政府政策不斷重演23條翻版，回歸時承諾既一國兩制係咪開始倒退呢？

iPhone 5 / iPad 3 10月上市？

今日有新聞知名蘋果消息網站DigiTimes表示, 台灣企業已開始生產iPhone 5和iPad 3的裝配零件。預計蘋果將於9月發佈，並預計10月上市。

之前iPhone 4的天線接收問題一直成為焦點，所以有傳蘋果因此加快推出iPhone 5。外傳iPhone 5新加功能包括：支援3G、4G視訊通話；內設32G、64G記憶體；HD高清錄放影像；臉部辨識系統，電池方面壽命更長達14小時通話時間，待機時間則達600小時。功能係比iPhone 4加強左, 不過外形上可能唔好咁高期望，之前傳會加大個mon既吋數，今次版本表示可能只係外殼顏色多左，得顏色多左…真係有D失望。

iPad2上市無耐，又傳出iPad 3將在今年十月現身，呢D真係蘋果既銷售手法。DigiTimes表示，iPad 3將具備更明亮、辨色度更高的AMOLED螢幕。電腦網站RCRWireless也指出，iPad 3一定會配備3D螢幕，因為荷李活片商有意在iPad 3上市後，推出3D電影。如果係真，到時真係3D電影想睇就睇。不過蘋果通常一年先出一次新產品，睇黎要等到下年春季前都唔會有iPad 3推出。